Koppieteefontein, met die immer-innemende Jak de Priester as aanbieder, se sesde seisoen begin op Dinsdag 8 April om 21:30. Dit skop af met die radio- en TV-aanbieder Rozanne McKenzie wat haar hart oopmaak. Volgende aan die beurt is die sanger en akteur Robbie Wessels wat kykers ’n kykie na sy lewe gee. Jak gaan oudergewoonte kiekies uit sy gaste se fotoalbums deel en hulle uitvra oor waarom dié foto’s vir hulle belangrik is.
 

Koppieteefontein begin op Dinsdag 8 April om 21:30.

La’t wiel is weer op die kassie op Dinsdag 15 April om 17:30, en petrolkoppe gaan beslis genoeg kry om hulle harte vinniger te laat klop. “Soos gewoonlik weerspieël La’t wiel die huidige stand van sake in die Suid-Afrikaanse motorbedryf, en tans is China besig om ’n reuse-impak op die motorwêreld te hê, ook hier by ons,” sê die vervaardiger en aanbieder Waldo de Waal. “Ons het ’n string motors uit China getoets, onder meer die MG Cyberster, ’n elektriese sportmotor wat jou R1,4 miljoen uit die sak gaan jaag en omtrent die koppe laat draai.”

Motors uit ander lande kry ook ’n beurt. “Die Duitsers by BMW het hulle Mini onlangs opgeknap, en ons maak kennis met die nuwe Mini Cooper S, asook die elektriese weergawe van dieselfde motor. Ons kyk ook na gebruikte motors wat by WeBuyCars te koop is, soek ’n paar winskopies en gesels met Giniel de Villiers oor vanjaar se Dakar-wedren.”

La’t wiel begin op Dinsdag 15 April om 17:30.

Met ’n huppel in die stap maak weer op Woensdag 2 April om 17:30 ’n draai. Die aanbieders is Riaan Cruywagen, Jacqui January, Bettie Kemp en Simon Bruinders. In die nuwe seisoen word daar gepraat met seniors wat nuwe boeke gepubliseer het. Kundiges gee raad oor haarverlies en nuwe aftreelandgoedere word besoek.

Met ’n huppel in die stap begin op Woensdag 2 April om 17:30.

Wie’s nuus? is terug vir ’n vyfde seisoen op Woensdag 30 April om 21:00. Mia Spies praat weer met nuusmakers wat op almal se lippe is, en soos gewoonlik gaan sy nie skroom om moeilike vrae te vra nie. Mia het vir die eerste keer as student agter die mikrofoon by TUKS FM ingeskuif en sê sy het van daardie oomblik geweet dit is haar roeping: “Ek is die gelukkigste met ’n mikrofoon in my hand.”

Wie’s nuus? begin op Woensdag 30 April om 21:00.

Die nuwe seisoene van al drie reekse word op kykNET (DStv-kanaal 144) uitgesaai en sal ook op DStv Stream en Catch Up beskikbaar wees.