Die regisseur van die reeks is die bekroonde Jaco Bouwer, en die draaiboek is geskryf deur Saartjie Botha en Philip Rademeyer. 

Die hoofkarakters is: 

Jonger André Fourie in die 1960’s (Janru Steenkamp)

André is die siel van die Fourie-gesin. Sjarmant, lewendig en altyd reg met ’n grappie, maar ná sy suster Issie se moord, verdwyn sy sorgeloosheid oornag. Skuldgevoelens, selfverwyt en ’n onwrikbare belofte aan sy suster dryf hom tot ’n obsessiewe soeke na geregtigheid. Sy wêreld is verwoes en hy weet: Hy sal nooit kan rus voordat hy die moordenaar vind nie. 

Ouer André Fourie in die 1980’s (Beer Adriaanse) 

Adjudant-offisier. Speurder. Eggenoot. Vader. Maar bo alles: ’n man verteer deur ’n belofte wat hy nie kan breek nie. Ná 18 jaar het André steeds ’n obsessie met die moorde, en dit hou hom gevange in die verlede. Hy is ’n briljante speurder, maar sy demone volg hom oral waar hy gaan. Hoeveel van homself is hy bereid om op te offer vir die waarheid? 

At van Wyk (Carel Nel)

In 1966 is hy ’n toegewyde speurder wat bo sy vermoë probeer om geregtigheid te laat seëvier, maar hierdie saak is een wat hom vir dekades sou teister. In 1984, as kolonel, is dit steeds sy grootste mislukking – die gruwelike misdaad waarmee iemand weggekom het. Vir At is dit nie net werk nie. Dis sy nalatenskap, sy gewete, sy laaste kans om ’n belofte aan homself gestand te doen. 

Dries Fourie (Jacques Bessenger) 

’n Pa met ’n stil hartseer. Dries voel verantwoordelik vir die tragedie, al sê niemand dit hardop nie. Hy probeer vrede maak, maar sy vrou se onblusbare woede en sy seun se onophoudelike soektog krap die wonde oop. Hy is die man wat stilweg ly, ’n steunpilaar wat al hoe meer verweer. \

Marie Fourie (Tinarie van Wyk-Loots) 

’n Ma sonder ’n dogter. ’n Vrou sonder vergifnis. Marie se verlies is allesverterend, haar hartseer ’n onlosmaaklike deel van haar wese. Sy klou vas aan haar woede, haar skuld, haar seer, want om te vergewe, sou beteken om te vergeet, en dít kan sy nie doen nie. 

Maks Fouché (Roeline Daneel)

Die vrou wat altyd moet kies – tussen haar man en haar familie, tussen haar vrees en haar plig. Sy was die versorger, die bemiddelaar, die een wat ander se laste moes dra. Maar die gewig word te swaar, en soos Gustaff, soek sy uiteindelik troos in die enigste ding wat die pyn kan verdoof. 

Gustaff Fouché (Albert Pretorius) 

Hy het die liggame gevind, en toe homself verloor. Die geliefde familieman is verteer deur drank en woede. ’n Man wat die mense om hom eens beskerm het, is nou gevange in sy eie nagmerrie en sy verhouding met Poppie, sy dogter, is ’n gemors. Niks kon hom op daardie dag voorberei nie, en niks sal hom ooit daarvan bevry nie. 

Henning Nel (Neels Clasen)

Henning was ’n trotse, sterk man – ’n pa wat orde handhaaf en sy gesin beskerm. Maar Petro se moord ruk sy wêreld onherroeplik uitmekaar. Hy dryf weg van sy vrou, sy kinders, homself. Waar daar vroeër humor en optimisme was, bly net ’n stomme, verskeurde man oor. Hy probeer aanhou, maar die gewig van verlies druk hom stadig dood. 

Ousus Nel (Erica Wessels)

Voor die moorde was Ousus die anker van die familie – ’n moederhen wat kos maak, versorg en vertroetel. Maar toe Petro vermoor word, breek iets onherstelbaar in haar. Sy verdwyn in haarself en haar huis wat voorheen vol lewe was, verander in ’n stil graf van verlore drome. Sy leef, maar net-net. Vir dekades bly sy ’n skaduwee, gevang in rou en die vrees dat die moordenaar steeds onder hulle is. 

Ander spelers in die rolverdeling sluit in Cintaine Schutte, Jana Kruger, Wessel Pretorius, Liam Bosman, Daneel van der Walt, Stian Bam, Mbulelo Grootboom, Neels van Jaarsveld, Deon Lotz en Ludwig Binge. 

• Niggies begin op 25 Maart om 20:00 op kykNET (DStv-kanaal 144) en sal ook op DStv Stream en Catch Up beskikbaar wees.