Die dramareeks Niggies se eerste drie episodes in April speel in die 1960’s af, maar skuif dan na die 1980’s wanneer ’n volwasse André (gespeel deur Beer Adriaanse) die moorde ondersoek. Dinge raak warm in die Kokkedoor-stoor, en ’n fassinerende dokumentêre reeks oor Afrikaans begin, asook opwindende nuwe leefstylreekse, wat Toerbroers: Jou toekoms en Bou of breek insluit.
kykNET
Niggies
Niggies is op ware gebeure gegrond en speel in twee tydvakke af – in 1966 wanneer die twee niggies, Issie Fourie en Petro Nel, vermoor word, en in 1984 wanneer Issie se broer, André, alles in sy vermoë doen om uit te vind wie daarvoor verantwoordelik was.
1 April
Episode 2: Ons mense
Die niggies se lyke word gevind. Issie se broer, André, voel verantwoordelik omdat hy nie na hulle gekyk het nie. Die plaaslike polisiekantoor is nie opgewasse om die saak te ondersoek nie.
8 April
Episode 3: Voor die regterstoel
Kaptein At van Wyk lei die ondersoek. Die niggies word begrawe, en André sweer ’n eed om die skuldige te vang. ’n Familielid word ingeneem vir ondervraging.
15 April
Episode 4: Wonde
Geen bewyse verbind die familielid aan die moorde nie. André sluit by die polisie aan. In 1984 heropen At die Niggies-saak nadat nuwe inligting aan die lig kom. André word by die ondersoek betrek.
22 April
Episode 5: Elkeen wat kwaad doen, haat die lig
’n Verdagte word ondersoek. André se obsessie met die saak veroorsaak konflik met sy ouers en gesin. Gustaff se verhouding met sy familie bereik ’n laagtepunt.
29 April
Episode 6: In die wind gestrooi
Die ondersoek is in ’n wedloop teen tyd gewikkel, aangesien die verdagte binnekort op parool vrygelaat word. Kriminele teiken André se gesin. Die verdagte se ouers word ondervra.
- Niggies is Dinsdae om 20:00 op kykNET (DStv-kanaal 144) en is ook op DStv Stream beskikbaar.
Kyk wie praat
2 April
Die tasse is gepak vir vakansie, en die kleinspan gaan op ’n reis. Hulle gesels klassieke musiek op die pad en vind uit of daar ander lande binne Suid-Afrika is.
9 April
Die klitse gesels oor grillerige goggas en die vraag: Is daar regtig iets soos “bad luck”?
16 April
Kan ’n mens Springbokrugby as ’n Paasfees beskryf? Wie is Rassie Erasmus? Is die Paashaas en Tandemuis maats?
23 April
Die kinders praat oor sterre, planete en komete en deel hulle opinies oor robotte in die toekoms.
30 April
In die finale program in hierdie seisoen keer die vier beste deelnemers terug om te speel vir die eerste plek en die R100 000 prysgeld wat die wenner kry.
- Kyk wie praat is Woensdae om 20:00 op kykNET (DStv-kanaal 144) en is ook op DStv Stream beskikbaar.
Kokkedoor: Vuur & vlam
3 April
Die Kokkedore moet ’n haas uit die hoed trek wanneer die braaibak ’n klompie vreemdhede oplewer. Braaiers wat te houtgerus geraak het, word gepootjie deur ’n tjoppie, worsie en hoenderboudjie.
10 April
Die uitdrukking “om jou eie potjie te krap” kry nuwe betekenis met ’n onverwagse span-kinkel. Die sangeres Rina Hugo kom kuier en bring haar sprankel saam, en Afrikaanse sêgoed lei tot nuwe geregte.
17 April
Die paspoorte word gestempel vir ’n braaibesoek aan vuurkulture in verre lande. Die uitheemse braaitoerusting, wind en weer plaas druk op die spanne wat veg vir ’n plek in die halfeindronde.
24 April
Die Kokkedore betree die wêreld van fynproewerskos. Die bekroonde gassjef Jess van Dyk daag die braaiers uit om elke element van haar komplekse vyfstergereg haarfyn oor die vuur te vertolk.
- Kokkedoor: Vuur & vlam is Donderdae om 20:00 op kykNET (DStv-kanaal 144) en is ook op DStv Stream beskikbaar.
Skryf in vir Kokkedoor: Son & see
Vir die tiende seisoen van kykNET se gewilde koswerklikheidsreeks Kokkedoor trek die program nie net ’n ander voorskoot aan nie, maar kry dit ook twee nuwe beoordelaars.
In sy volgende gedaante gaan die reeks as Kokkedoor: Son & see bekend staan, en die koskenners Herman Lensing (37) en Yolani Abrahams (32) gaan besluit watter deelnemers koning kraai.
kykNET soek nou na kandidate vir dié reeks, wat in November en Desember ’n hoofgereg op die kykNET-spyskaart gaan wees.
Die prysgeld vir Kokkedoor: Son & see se wenspan is R500 000.
Volgens Kokkedoor se publisiteitsbestuurder, Wilmer Müller, is daar ’n paar unieke bestanddele in Kokkedoor: Son & see wat dit van die vorige reekse onderskei.
“Mense moet as ’n span van twee familielede inskryf, en daar moet boonop ’n generasiegaping van ten minste 20 jaar tussen die twee spanlede wees,” sê hy. “Dit kan, byvoorbeeld, ’n ouma en ’n kleindogter, ’n ma en seun, skoonsusters of niggies en neefs wees – solank daar ’n tipe familieverband is en die jongste spanlid ten minste 18 jaar oud is.
“Nog ’n verskil is dat daar vir Kokkedoor: Son & see net na huiskokke gesoek word en dat daar nie deelnemers met ’n kwalifikasie as professionele sjef gaan wees nie. Die rede hiervoor is dat Kokkedoor: Son & see die kollig wil laat val op die nostalgiese rol wat kosmaak in ’n familieverband speel en die manier waarop dit soos ’n goue draad tussen die verskillende generasies loop.”
Wat jy alles moet weet om in te skryf:
Kry die aansoekvorm by kyknet.tv en volg die stappe of stuur ’n e-pos na navrae@kokkedoor.tv.
- Sluitingsdatum vir inskrywings is 30 April 2025.
- Die jongste lid van die span moet ten minste 18 jaar oud wees, en die generasie- en ouderdomsverskil tussen die spanlede moet ten minste 20 jaar wees.
- Daar móét ’n familieverwantskap wees, soos ’n ouer of stiefouer, oupa, ouma, skoonfamilie, ooms, tannies, niggies of neefs.
- Oudisies sal in Kaapstad gehou word tussen 5 en 9 Mei 2025.
- Verfilming is van 20 Junie tot 3 Julie 2025 in Struisbaai.
Vreemder as fiksie
7 April
Merenthia se lewe het onherroeplik verander toe sy en haar gesin gaan foefieslaaid het. Sy is sedertdien ’n parapleeg. Nou gee stamselterapie haar hoop dat sy weer sal kan loop.
14 April
Die Damonse is ’n gesin van tragedie en wonders. Joseph is verlam in ’n motorongeluk, en Denielle is in die gesig geskiet, maar hulle het desnieteenstaande die ouers van ’n dowe seuntjie geword, en opgee is nie vir hulle ’n opsie nie.
21 April
Toe enkelma Liézel Els vir die sewende en laaste keer probeer swanger raak is haar tweeling, Nélius en Lia, danksy IVF gebore. Sy moes toe hoor Lia het ’n rare breinkondisie.
28 April
Raémondo se ledemate is voor sy eerste verjaardag geamputeer nadat hy meningokokkale meningitis (breinvliesontsteking) gekry het. Vandag blink hy uit in branderplankry en het al oorsee gaan naam maak.
- Vreemder as fiksie is van 7 April op Maandae om 20:00 op kykNET (DStv-kanaal 144) en sal ook op DStv Stream beskikbaar wees.
Laataand by Rian
Hy het ’n gawe om mense aan die praat te kry, en in April gaan Rian van Heerden dit weer doen wanneer die vierde seisoen van Laataand by Rian afskop.
Rian praat weer reguit met mense wat die land aan die gons het – van hulle omdat hulle deur diep waters gaan; ander omdat hulle sterk standpunt oor ’n saak inneem.
“Die nuwe seisoen belowe natuurlik nog interessante bekendes en nuusmakers, sowel as hulle verrassingsgaste,” sê Rian. “Kykers kan ook hier en daar mense verwag wat nie ’n wag voor hulle mond het nie en vir vurige debat sorg.”
Van die gaste wat saam met hom om ’n tafel gaan kuier, is die sanger Heinz Winckler en sy vrou, Aletté, wat in die nuus was omdat daar teenkanting teen hulle boekbekendstelling was; die veteraanradio-aanbieder Darren Scott wat deur ’n gesondheidskrisis gaan, maar weier om te gaan lê; die TikTok-ster Terrible Tess en die sanger en liedjieskrywer Jan Blohm, wat deur sy loopbaan al verskeie oppe en affe gehad het.
Die aktrise en komediant Marion Holm, die akteur en aanbieder Soli Philander en Brett Shuttleworth, ’n voormalige rugbyspeler wat deesdae model en akteur is, kuier ook saam, asook die entrepreneur Vusi Thembekwayo en Ernst Roets, wat ná 20 jaar uit die Solidariteit-beweging bedank het. Die vervaardiger van Laataand by Rian is Provoco-produksies.
- Die vierde seisoen van Laataand by Rian begin Dinsdag 8 April om 21:00 op kykNET (DStv-kanaal 144) en sal ook op DStv Stream beskikbaar wees.
Bou of breek
Of dit nou is om ’n bestaande vertrek ’n heel nuwe gedaante te gee of die bou van ’n splinternuwe huis – niks is te veel gevra vir Johan en Zanelle Dorfling, eienaars van Country Home and Design in Jeffreysbaai, nie.
In ’n nuwe leefstylprogram, Bou of breek, gaan dié talentvolle egpaar oor 13 episodes wys hoe hulle, binne begroting, nuwe lewe in bestaande ruimtes blaas, van die Oos-Kaap tot Stellenbosch. In elke episode werk die Dorflings saam met hulle kliënte om enigiets van woonhuise tot besighede in asemrowende plekke te omskep.
Die vervaardiger van die reeks is die akteur Reynardt Hugo, wat met sy produksiemaatskappy, StraatKatMedia, ook verantwoordelik was vir die gewilde reeks Net mens.
“Dit is verstommend om te kyk na die pad wat ek geloop het en die geboorte van StraatkatMedia – van die idee vir Net mens, wat ek vier jaar gelede gehad het, tot op die drumpel van hierdie eerste Suid-Afrikaanse huisopknap- en huisbouprogram van sy soort,” sê Reynardt. “In Bou of breek verf ons nie net mure nie. Ons bou huise van die grond af op en maak bestaande plekke baie mooi. Ek is opgewonde en geweldig trots op almal wat so hard aan hierdie projek gewerk het. Dit gaan nie net oor fisiese restourasie nie, maar ook oor die herstel van die siel. Dit is die storie van ’n wonderlike familie, die Dorflings en hulle twee kinders, en die eeue oue vraag: Gaan jy bou of gaan jy breek? Die keuse is joune.”
Johan, beter bekend as Pikkie, en Zanelle is 20 jaar getroud en is amper teenpole van mekaar. Johan is ’n introvert; Zanelle ’n ekstrovert. Johan neem sy tyd met besluite; Zanelle doen voor sy dink. Johan is presies; Zanelle kleur maklik oor die lyne in, maar elkeen bring hulle eie unieke ondervinding, vaardigheid en kunstigheid na alles wat hulle aanpak.
“Ons ondervinding is opgebou deur jare lange ervaring, deur foute te maak en te leer, deur ’n gelukkie te slaan, deur ’n hou of twee te vat saam met al die oppe en affe wat ’n projek na jou kant toe kan gooi,” sê Johan.
“Vir die meerderheid mense is bou of restourasie ’n vloekwoord. Vir ons is dit ’n geleentheid om iets te skep,” sê Zanelle. “Die mikpunt is altyd om enige projek beter te doen as wat ’n kliënt self sou kon, maar teen ’n laer prys as wat verwag is of vir minder geld as wat dit die kliënt op sy eie sou kos. Niks is meer bevredigend as om ons passie en ervaring te gebruik om ’n positiewe verskil in iemand se lewe te maak nie.”
Van die projekte wat in Bou of breek gesien gaan word, sluit die restourasie in van ’n huis in St. Francisbaai vir ’n familie wat Johannesburg vir die Oos-Kaap verruil het, ’n barbierwinkel in Stellenbosch en ’n huis op die Gamtoosrivier wat in gaste-akkommodasie omskep word.
- Bou of breek begin Sondag 6 April om 17:30 op kykNET (DStv-kanaal 144) en sal ook op DStv Stream beskikbaar wees.
Leef jou reis
Met ’n paar propvol paspoorte en nie minder as 85 lande wat hy reeds besoek het nie, is Gerrie Pretorius en sy geliefde reisprogram terug op die kassie. Hierdie dertiende seisoen beloof om kykers na inspirerende bestemmings te neem en gaan vol verrassing wees – van legendariese historiese roetes tot seldsame natuurverskynsels en kulturele ervarings.
Daar is verskeie hoogtepunte. In Venesië het Leef jou reis eksklusiewe toegang tot Venesië se nooddienste gekry, en Gerrie het meer uitgevind oor hoe die stad se waterambulanse en ander noodreaksiestelsels funksioneer. Hulle vertel ook die storie agter ’n 300 jaar oue houtrolstoel wat steeds in gebruik is en wys hoe die inwoners aanpas by die konstante uitdagings van stygende en dalende watervlakke.
In nog ’n hoogtepunt word daar in Turkye besoeke aan historiese karavaanherberge, die marmerstrate van Ephesus, die sewe kerke van Openbaring en die ikoniese sprokieslandskap van Kappadosië, bekend vir sy feetjietorings en ondergrondse stede, gebring.
Wanneer ’n mens aan die wêreld se grootste soogdiermigrasie dink, is die Serengeti se wildebeeste dikwels die eerste beeld wat opkom. Die ware rekordhouer is egter ’n veel meer verrassende verskynsel – die jaarlikse migrasie van meer as 10 miljoen vlermuise in Kasanka Nasionale Park, Zambië. Hierdie massabeweging is een van die mees indrukwekkende natuurverskynsels op aarde en ’n seldsame skouspel wat slegs vir ’n kort tydperk elke jaar plaasvind. Die Leef jou reis-span was daar om dit te beleef.
“Die program het sedert die eerste seisoen mense inspireer om die wêreld te verken, maar die handelsnaam Leef Jou Reis speel ook ’n leidende rol in die toerismebedryf,” sê Gerrie. “Dis ’n gerespekteerde naam in die nasionale- én internasionale toerbedryf en ons span word gereeld deur ambassades en toerisme-owerhede genooi om gesprekke oor die toekoms en ontwikkeling van reis te lei. Leef Jou Reis neem mense ook op eksklusiewe toere na groot sportgeleenthede, soos die F1-wedren in Abu Dhabi, en ekspedisies na Antarktika.”
Ander hoogtepunte in die dertiende seisoen sluit besoeke aan Granada, Málaga en Marrakesj in, asook ’n reis op Suid-Afrika se luukse Bloutrein en ’n soektog na versteekte aantreklikhede in Kaapstad.
- Die nuwe seisoen van Leef jou reis begin 5 April om 19:30 op kykNET (DStv-kanaal 144) en sal ook op DStv Stream beskikbaar wees.
Toerbroers: Jou toekoms
Andries Hendrik Potgieter en Wiaan Fourie van die Toerbroers-reisagentskap het ’n nuwe projek, en kykNET-kykers kan deel in dié interessante nuwe veer in hulle hoed.
Andries en Wiaan, ook bekend as die lede van die sanggroep DZL, het besef daar is jong mense wat matriek geskryf het en dan ’n oorbruggingsjaar wil neem, maar nie altyd by die regte plek aanklop om ’n toekoms te verseker nie.
In Toerbroers: Roer jou toekoms, wat van 3 April om 17:30 op kykNET (DStv-kanaal 144) te sien sal wees, neem Andries en Wiaan aanvanklik 45 studente, wat joggies genoem word, onder hande en wys hulle hoe ’n beroep in natuurbewaring en toerisme lyk. Hierdie groep word vinnig afgewerk na 25, 15 en ’n toptien, en daarna word iemand elke episode uitgestem. Al 45 kan egter steeds gesien word gedurende die reeks – selfs dié wat uitgeval het.
Die top-15-joggies woon permanent op die Toerbroers-kampus waar hulle, onder meer, kursusse bywoon, take uitvoer en, meer belangrik, ook praktiese ondervinding opdoen wat deel van hulle persoonlike ontwikkeling vorm. Gedurende die 13 episodes kry die joggies ’n kykie na dit wat hulle deur die loop van hulle twaalf maande lange geakkrediteerde toerismekursus gaan leer en ervaar. Deur Toerbroers-kursusse kan jong natuurliefhebbers ’n verskeidenheid NQF Vlak Vier- en NQF Vlak Vyf-sertifikate wat deur CATHSSETA, AgriSETA en SAQA geakkrediteer is, verwerf. Elke week word daar ook ’n uitdaging gestel waarna die topdriejoggies aangewys word wat met werks- en opleidingsgeleenthede by Toerbroers en hulle vennote beloon word. Die uiteindelike topvier stap met fantastiese pryse en groot geleenthede weg.
Die joggies kry punte vir hulle take, en volgens die vervaardigers kan kykers hulle gereedmaak vir ’n hele klomp verrassings, kinkels en intriges. Die reeks word deur Toerbroers, tans die grootste Afrikaanse reisagentskap in die wêreld, geborg, en kykers sien hoe Andries en Wiaan elke week opvoedkundige instellings, diere-organisasies en reisbestemmings saam met gaste besoek en leer só ook die joggies ken.
- Toerbroers: Jou toekoms begin op Donderdag 3 April om 17:30 op kykNET (DStv-kanaal 144) en sal ook op DStv Stream beskikbaar wees.
Die stories van Afrikaans
Die nuwe dokumentêre reeks Die stories van Afrikaans vier en verken die taal se merkwaardige geskiedenis deur die loop van agt episodes. Met ryk argiefmateriaal en meer as ’n 100 gesaghebbende stemme sny dié reeks die spore van die fassinerende ware verhale van die karakters, botsings, liefdes en langpaaie wat die taal deur vier eeue gebrei het en aan die Afrika-grond bind – van die smeltkroes aan die Kaap waar drie kontinente ontmoet het tot in die onstuimige hede waar daar ewe veel opgewondenheid as kommer rondom die taal is.
Die reeks is deur Bonanza Films vervaardig, wat ook vir gewilde programme soos Elders en Welvaartskeppers verantwoordelik is. Die Safta-bekroonde kinematograaf PJ Kotzé het die reeks geskiet, en die ervare Frankie Opperman is die regisseur.
Elke episode het ’n eie verteller, wat bestaan uit agt ikoniese akteurs en stemkunstenaars: Sandra Prinsloo, Zane Meas, June van Merch, Albert Pretorius, Dean Balie, Frank Opperman, Lee-Ann van Rooi en Tinarie van Wyk Loots.
Die navorsing en inhoudsregie is deur twee bekroonde joernaliste behartig: Erns Grundling, wat ook ’n medevervaardiger van die reeks is, en die digter Danie Marais.
“Ek glo dié reeks gaan kykers plek-plek verstom met dinge wat hulle nie geweet het nie, en hulle soms laat sluk aan ’n knop in die keel. Maar daar’s baie humor ook en soveel kleurvolle karakters wat hul ervarings en insigte deel,” sê Danie Marais.
Erns Grundling sê dis veral die vele tongvalle van Afrikaans wat in hierdie reeks opklink wat hom opgewonde maak. “Ons het die net wyd gegooi en wyd gereis, van Kaapstad tot in die Noorde, en ook in Nederland en België gaan draai.
“Hierdie mylpaaljaar van Afrikaans se eeu as amptelike landstaal is ’n ideale geleentheid om bestek op te neem en ’n geskiedenis te heroorweeg wat veel verder as ’n 100 jaar strek. Wat ook al jy dink of glo, jy sal stemme in dié reeks vind met wie jy heelhartig kan saamstem en verskil.”
- Die stories van Afrikaans begin op Sondag 27 April om 20:00 op kykNET (DStv-kanaal 144) en sal ook op DStv Stream beskikbaar wees.
Nuwe seisoene van staatmakerreekse
Vier gewilde reekse is met vars inhoud terug op kykNET in April.
Koppieteefontein, met die immer-innemende Jak de Priester as aanbieder, se sesde seisoen begin op Dinsdag 8 April om 21:30. Dit skop af met die radio- en TV-aanbieder Rozanne McKenzie wat haar hart oopmaak. Volgende aan die beurt is die sanger en akteur Robbie Wessels wat ’n kykie na sy lewe gee. Jak gaan oudergewoonte kiekies uit sy gaste se fotoalbums deel en hulle uitvra oor waarom dié foto’s vir hulle belangrik is.
La’t wiel is weer op die kassie vanaf Dinsdag 15 April om 17:30, en petrolkoppe gaan beslis genoeg kry om hulle harte vinniger te laat klop. “Soos gewoonlik weerspieël La’t wiel die huidige stand van sake in die Suid-Afrikaanse motorbedryf, en tans is China besig om ’n reuse-impak op die motorwêreld te hê, ook hier by ons,” sê die vervaardiger en aanbieder Waldo de Waal. “Ons het ’n string motors uit China getoets, onder meer die MG Cyberster, ’n elektriese sportmotor wat jou R1,4 miljoen uit die sak gaan jaag en omtrent die koppe laat draai.
Motors uit ander lande kry ook ’n beurt. “Die Duitsers by BMW het hulle Mini onlangs opgeknap, en ons maak kennis met die nuwe Mini Cooper S, asook die elektriese weergawe van dieselfde motor. Ons kyk ook na gebruikte motors wat by WeBuyCars te koop is, soek ’n paar winskopies en gesels met Giniel de Villiers oor vanjaar se Dakar-wedren.”
Met ’n huppel in die stap val weer vanaf Woensdag 2 April om 17:30 weekliks in. Die aanbieders is Riaan Cruywagen, Jacqui January, Bettie Kemp en Simon Bruinders. In die nuwe seisoen word daar gepraat met seniors wat nuwe boeke gepubliseer het. Kundiges gee raad oor haarverlies, en nuwe aftreelandgoedere word besoek.
Wie’s nuus? is terug vir ’n vyfde seisoen op Woensdag 30 April om 21:00. Mia Spies praat weer met nuusmakers wat op almal se lippe is, en soos gewoonlik gaan sy nie skroom om moeilike vrae te vra nie. Mia het vir die eerste keer as student agter die mikrofoon by TUKS FM ingeskuif en sê sy het van daardie oomblik geweet dit is haar roeping: “Ek is die gelukkigste met ’n mikrofoon in my hand.”
- Koppieteefontein begin op Dinsdag 8 April om 21:30.
- La’t wiel begin op Dinsdag 15 April om 17:30.
- Met ’n huppel in die stap begin op Woensdag 2 April om 17:30.
- Wie’s nuus? begin op Woensdag 30 April om 21:00.
Die nuwe seisoene van al vier reekse word op kykNET (DStv-kanaal 144) uitgesaai en sal ook op DStv Stream beskikbaar wees.
Nostalgie: Amalia
Die digter Amalia Malan Vos (Illse Roos) word dood aangetref. Haar vriendin Tina Wilsenach (Hélène Truter) verdink Amalia se man, Piet Vos (Dawid Minnaar). Kaptein Wollie de Wet (Marius Weyers), speurhoof op Meerhof, ruik egter ’n rot. Ook in die rolverdeling is Anna-Mart van der Merwe, Marcel van Heerden, Tobie Cronjé en Louis van Niekerk. Die reeks is deur Chris Barnard geskryf, en die regisseur is Katinka Heyns.
- Amalia begin op 20 April om 21:00 op kykNET (DStv-kanaal 144) en sal ook op DStv Stream beskikbaar wees.
Old Righteous Blues
Old Righteous Blues, wat Suid-Afrika se inskrywing as beste internasionale rolprent vir vanjaar se Oscars was, is die roerende verhaal van ’n jong man, Hantjie Jansen, se droom om sy gemeenskap te herenig.
Op Kersdag 1997 ontvang Hantjie opwindende nuus. Sy Oom Jakwes, wat jare lank die Kerskoor se trommelmajoor was, tree af. Hantjie droom van kleintyd af daarvan om trommelmajoor te word, maar die bejaarde koorleiers wil niks daarvan weet nie.
Twintig jaar gelede het sy pa ’n keuse gemaak wat die geliefde Old Righteous Blues Kerskoor in twee geskeur het. Toe twee vyandiggesinde groepe daarna ontstaan, het dit twis en vernietigende geweld in die gemeenskap veroorsaak. ’n Generasie later is daar ’n nuwe gevoel van eenheid in die land ná die eerste demokratiese verkiesing. Dit kan die geleentheid wees vir Hantjie om die gemeenskap te herenig en sy droom te verwesenlik, maar dit sal ’n titaniese stryd verg – en nie net om trommelmajoor te word nie. Dis ’n Romeo en Juliet-storie in Robertson in die Wes-Kaap, gekruie met liefde, begeerte, ambisie en die verskrikking van ’n ou vete.
In die rolverdeling is, onder andere, Ayden Croy as Hantjie, Ivan Abrahams as Oom Sampie, Joshwin Dyson as Elvin, Stefan Erasmus as Kristof en Talia Davis as Elzette.
- Old Righteous Blues wys 19 April om 20:00 op kykNET (DStv-kanaal 144) en sal ook op DStv Stream beskikbaar wees.
Sepies
Binnelanders
Weeksdae om 19:30 op kykNET (DStv-kanaal 144)
Kiepersol kry ’n nuwe bestuurder, maar Delia is bekommerd wanneer sy hoor wie dit is. Nicolette ontvang ontstellende nuus, en die registrars verloor alle vertroue in Joe wanneer hulle uitvind wat hy agter iemand se rug gedoen het. Yvonne voel seergemaak oor Anya, en LJ is vas oortuig hy het iets oor sy verlede ontdek wat sy hele lewe sal verander. Max neem ’n besluit waarmee Joe nie saamstem nie, en Ella ontdek die rede waarom Annetjie so vyandig teenoor haar optree.
Anya deel nuus met Max wat hom heeltemal uit die veld slaan, en Uys word onkant betrap wanneer ’n onverwagte besoeker by Binneland opdaag. Joe neem ’n belangrike besluit oor sy toekoms, en wanneer Thalia uiteindelik besluit om vir LJ te vergewe, deel hy nog nuus met haar. Cecile is baie ingenome met haarself, veral wanneer sy dink ’n sekere dokter vind haar interessant.
Suidooster
Weeksdae om 18:00 op kykNET (DStv-kanaal 144) en 18:30 op kykNET&kie (DStv-kanaal 145)
Carlo raak meer betrokke by Nazeem se onwettige bedrywighede onder die skoolkinders, en sy besluite begin om al hoe meer ’n effek op die mense rondom hom en sy verhoudings te hê. Lee-Ann en Wade vind uit waarmee hy besig is en probeer agter die kap van die byl kom. Dit is egter makliker gesê as gedaan, want Nazeem weet hoe om sy spore dood te vee en sal niks of niemand ontsien om homself te beskerm nie. Beide Riaan en Bianca is onderskeidelik reg om weer hul hand aan die liefde te waag, en kort voor lank ontmoet Riaan ’n aantreklike sopraan. Bianca laat egter ook nie gras onder haar voete groei nie en ’n lang donkerkopman slaan haar voete onder haar uit. Het Mymoena se “Blom” uiteindelik dié een ontmoet of gaan sy weer seergemaak word? Elana raak bevriend met ’n indrukwekkende sakevrou, Amor, wat dalk selfs vir haar ’n nuwe loopbaanvooruitsig kan beteken.
Diepe waters
Maandae tot Donderdae om 18:30 op kykNET (DStv-kanaal 144)
April is vol drama met verhoudings wat getoets word, geheime wat opduik, en onverwagte uitdagings wat alles omvergooi. Bianca probeer ou bande herstel, terwyl Zelda voor ‘n donker keerpunt te staan kom.
Gesinsbande word beproef wanneer verskuilde waarhede ontbloot word. Gys en René se band versterk, maar dit kom met komplikasies, terwyl Sanet en Fourie se verhouding herhaaldelik ontwrig word. Pam ontvang skokkende nuus wat haar dwing om moeilike besluite te neem, en Lettie en Henry se pad neem ’n onverwagse wending.
Namate April ontvou, word Fourie gekonfronteer met ’n onthulling uit sy verlede, en Zelda se welstand bly ’n bron van kommer. Ligte oomblikke breek die spanning, maar teen die einde van die maand dreig verpletterende nuus om alles te verander. Maak gereed vir hartseer, verrassings en onvergeetlike kinkels.
kykNET&kie
Skemergrond
Maandae tot Donderdae om 19:30 op kykNET&kie (DStv-kanaal 145)
Brandon is ontsteld ná Sylvia en Shakiel se dood, terwyl Kevin en Gloria nadink oor hul toekoms saam. Terwyl Kevin met die lewe se druk worstel, staar ’n moeilike besluit hom in die gesig wat lewensveranderende gevolge kan hê.
Ruan sukkel met sy skuldgevoelens oor die sterftes in die dorp, maar sy bekommernisse hou nie daar op nie. Daar is ’n nuwe saak om op te los wanneer Junior ’n skokkende ontdekking oor ’n graf op die plaas maak, wat Dirk en Tillie in ’n toestand van paniek laat.
Amber se DNS-toetsresultate jaag emosies op, en die waarheid oor Lily se verlede begin ontrafel. Kirby verdiep haar manipulasies om Amber te korrupteer, en Lily raak al hoe meer desperaat om vrede met haar te maak. Kirby se plan is in volle swang, maar hoe lank sal sy met haar leuens kan byhou?
Plaas van passie
Maandae tot Donderdae om 20:00 op kykNET&kie (DStv-kanaal 145)
Antônio probeer om Caio te onterf, maar Caio baklei vir sy erfdeel teen sy aggressiewe pa. Aline veg vir haar deel van die plaas wat deur haar man nagelaat is. Jurecê gee vir Aline die titelakte op haar grond, wat hy op Samuel se versoek bewaar het. Caio blaas stoom af by Aline. Cândida bepleit Caio se saak by Antônio, maar tevergeefs. Caio reageer daarop dat hy deur Antônio uit sy huis geskop is. Lucinda ontvang komplimente van Marino, en Aline konfronteer Antônio. Caio en Daniel sluit ’n ooreenkoms.
Lucinda bied aan om Aline te help, en Ademir stem in om haar te ondersteun. Aline vind uit dat Antônio water van haar grond af lei. Daniel bely sy liefde vir Aline, en Irene gee voor om Daniel te ondersteun wanneer hy onthul dat hy lief is vir Aline. Antônio weier om die dagvaarding vir Caio se regsgeding teen hom te onderteken. Aline vertel vir Daniel van haar gesprek met Irene. Aline vrees vir Isabel se veiligheid. Isabel vra vir Antônio vir geld in ruil vir die brief wat Aline geskryf het.
Koortjies met Elwira Standili
Sondae om 19:00 op kykNET&kie (DStv-kanaal 145)
6 April
Die sensitiewe onderwerp van seksuele mishandeling word bespreek. Claire Phillips deel haar kragtige belydenis, en die kliniese sielkundige Simone Arendse gee raad oor hoe om trauma te hanteer.
13 April
Die akteur Anton Jephta en sy geestelike raadgewer, pastoor Aldrin Adams, vertel hoe hulle dit regkry om in hulle geloof gewortel te bly. En dan sing die groep New Birth die plek aan die brand.
20 April
Dis Paasfees, en om dit te vier gesels Biskop André Horn oor die Kruisiging, en Vader Ronald Muller praat oor die Opstanding. Daarna kry Victory in Praise almal op hulle voete met hul musiek.
27 April
Ter viering van Vryheidsdag vertel die legendariese Vicky Samson en ikoniese skrywer Diana Ferrus wat vryheid vir hulle beteken. En dan blaas Vicky almal weg met haar musiek.
kykNET Nou!
Paasfees word op kykNET Nou! (DStv-kanaal 146) gevier met die musiek van geliefde kunstenaars soos Riana Nel, Juanita du Plessis, Retief Burger, Dewald Gouws, Nuwe Lof, Louis Brittz, Natasha Joubert en Cowboys4God.
Uitsendingstye van die Dis Paasfees-musiekblokke is as volg:
Vrydag 18 April
09:30 – 10:30
14:00 – 15:00
16:00 – 18:00
Sondag 20 April
10:00 – 11:00
13:00 – 15:00
Bly ingeskakel op die kykNET-kanale vir die beste in wêreldklas Afrikaanse vermaak.